Reynke de Vos, book 4, chapter 13

How Reynke traveled to his castle with his friends and relatives and how they said goodbye to him. The conclusion and the last chapter.



¶ Wo Reynke myt synen vrunden ghynck na syner borch vnde wo se orloff van eme nemen. Dat besluth vnde dat leste capittel.

ALsus gynck Reynke na syneme huß
Myt synen vrunden to Malepertuß.
Reynke danckede en allen sere
Der groten gunst, der groten ere,
6795 Dat se eme bystunden in der noth;
Synen denst he ene wedder both
Islyk scheyde vnde ghynck to den synen.
Reynke ghynck to vrouwe Armelynen,
De en seer vruntlyk wylkomen heet.
6800 Se vragede en vmme syn vordreet,
Wo he dar were vth ghekomen.

¶ Reynke sprack wedder: „al myt vromen.
Ik byn groet in des konnynges gnade.
He satte my wedder to syneme rade
6805 In synen hoff bouen alle de heren,
Al vnseme slechte to groten eren.
He makede my to kentzeler des rykes
Vnde bevol my syn ynghesegel des ghelykes.
Wat Reynke deyt vnde wat Reynke schrift,
6810 Dat sulue wol ghedan vnde gheschreuen blyft.
Ik hebbe vnderwyset in dessen dagen
Den wulff, dat he nicht meer wert klagen.
Ik hebbe en ok halff gheblendet,
Dar to syn hele slechte gheschendet.
6815 Ik hebbe en ghelübbet, ya, alzo seer,
Der werlde wert he neen nutte meer.
Wy slogen kamp, ik helt en vnder;
Wert he ghesunt, dat deyt my wunder.
Dat hope ik nicht, doch lycht dar nicht an;
6820 Ik byn gheworden syn ouerman,
Dar to ok alle syner ghesellen,
De des myt em helden vnde byvellen."

¶ Desses was de vossynne seer vro
Vnde syne twey kyndere ok alzo,
6825 Dat er vader sus was vorheuen.
Se spreken: „ya, nu wyl wy leuen
In groten eren, ane sorghe,
Vnde maken vast vnse borghe."

¶ Sus is nu Reynke hoch gheeret,
6830 So hir myt korte is gheleret.
Eyn yslyk schal syk tor wyßheyt keren,
Dat quade to myden vnde de dögede leren.
Dar vmme is dyt boek ghedycht,
Dyt is de syn vnde anders nicht.
6835 Fabelen vnde sodaner bysproke mere
Werden ghesath to vnser lere,
Vppe dat wy vndoget scholen myden
Vnde leren wyßheyt to allen tyden.
Dyt boek is seer gud to deme koep,
6840 Hir steyt vast in der werlde loep.
Wultu wetten der werlde stad,
So koep dyt boek, dat is rad.
Alsus endyget syk Reynkens ystorien.
God helpe vns in syne ewygen glorien!