Reynke de Vos, book 1, chapter 31

Reynke de Vos, Honour

How Reynke's opponents were frightened and outraged because Reynke was released; and how Isegrim and Brun were captured and mistreated. The XXXI. chapter.



¶ Wo Reynkens wedderparte syk vorschreckeden vnde vntofreden weren, do Reynke loß wart, vnde wo Ysegrym vnde Brun ghevangen worden vnde öuel ghehandelt.    Dat XXXI. ghesette.

Hyntze sprack van groteme torn:
2610 „Alle vnse arbeyt ist vorlorn",
To Ysegryme vnde ok to Brune,
„Ik wolde, dat ik were to Luntertune.
Is Reynke wedder in des konnynges gunst,
He wert bruken alle syne kunst,
2615 Alle dre werde wy nu beth gheschendet.
He heft my rede eyn oghe gheblendet,
Dat ander oghe steyt nu euentür."

¶ Brun sprack: „gud rad is hir nu dür."
Isegrym sprack: „dyt is seltzen dynck,
2620 Gha wy hen vor den konnynck."
Se ghyngen hen myt drouygen synnen,
Isegrym vnde Brun, vor de konnygynnen.
Se spreken vp Reynken mannich wort.
De konnynck sprack: „hebbe gy id nicht ghehort?
2625 Ik hebbe Reynken to gnaden entfangen."
De konnynck wart tornich vnde leet se vangen,
Brunen vnde Ysegrym, myt der hast,
He leet se bynden vnde sluten vast.
He was en doch quad vmme de word,
2630 De he van Reynken hadde ghehord.
Alzus krech vp den suluen dach
Reynkens sake eynen vmmeslach.
Syne wedderparten he sus vorreet
Vnde vorwerff ok, datmen do sneet
2635 Van Brunen rugge eyn vel aff,
Datmen em to eyneme rentzel gaff,
Voetes lanck vnde voetes breet.
Allentelen wart sus Reynke bereet.
Reynke bath de konnygynnen do,
2640 Dat se eme wolde schaffen twey scho,
Vnde sprack: „vrouwe, ik byn yuwe pelegrym.
Hir is myn ouerhere Ysegrym,
De heft veer scho, vast vnde gud,
Der suluen ik twey hebben mod.
2645 Bestellet my dat by myneme heren.
Ok moed vrouwe Gyremod twey entberen,
Se blyft doch to hus in ereme ghemack."
To hant de konnyngynne sprack:
„Scholdet ok kosten erer beyder lyff,
2650 Isegrymen mene ik vnde syn wyff,
Se möten malck twey scho entbern."
Reynke sprack: „ik dancke yw gern.
Nu kryghe ik veer gude scho.
Ja, alle dat gude, dat ik do,
2655 Des schole gy mede deelaftych syn,
Gy vnde ok de here myn.
Wente yd is yslykens pelegrymen recht,
Dat he vor de to bydden plecht,
De em helpen myt ychteswes.
2660 Dat do gy vlytich, god lone yw des."