|
|
This is a transcription of the dialogues in the dance of death in Füssen.
The text in the painting is very easy to read, but on the other hand it is difficult to know how many times it has been renovated.
|
der Todt.
1
Hailig seÿt ihr auff erdt genant,
Ohn Gott der höchst ist euer standt,
Doch kan ich warlich nit vmgon
Ich mueß mit euch den vortanz hon.
der Bapst.
5
O Adam Adam vatter mein,
Vnß hast gebracht in dise pein.
Ietz mueß ich tantzen allen vor
Kompt allhernach zum todten thor.
|
der todt
9
Herr Kaÿser kompt In raÿen rein,
Und tantzt fein nach den Bapst hinein.
Euer reich und gwalt hat auch ein endt,
Drum spert euch nit komt her nur gschwendt.
der Kaÿser
13
Mein land vnd leüt ich meren thet
Meim feindt auch dapffer widerstrebt,
Allein der Todt ist mächtig mein,
Der sprengt mich auch in raÿen rein.
|
Der todt
17
Habt ihr mit Frawen hoch gesprungen
O stoltzer Fürst, hats euch wolglungen
Das muest ihr an den raÿen biessen
Kompt hehr vnd thuet die todten grüesen.
der Fürst,
21
O mordt, mues ich so flux dar von
Land, leidt, weib, kind dahinden lon,
So erbarm sich Gott in seinem reich,
Ietzund wierd Ich meim tantzer gleich.
|
Der todt.
25
Herr Bischoff weis vnd wolgelert
Euer würde hat sich auch verkert.
Gebt auff, ist Zeit das Regiment,
Euer leben eilt ietz auch zum endt.
der Bischoff.
29
Ich bin gar hoch geachttet worden,
dieweil Ich lebt in Bischoffs orden.
Nun kom ich auch ins todten band,
Secht zu, er fiert mich bei der hand.
|
der todt.
33
Ich tantz euch vor Fraw Fürstin fein,
Nur sprengt hernach der tantz ist mein.
Wo ist ietz vnd ewr hoffgsindt blach,
Ist alß verschwunden wie der rach.
die Fürstin.
37
O weh vnd ach an ietz vnd immer,
Wo ist ietzund mein Frawen Zimmer.
Heut Fürstin vnd dan nimmermeh,
O angst vnd noth wie thuets so weh
|
[der todt.]
41
Herr Doctor bschaut mein zarten leib,
Ob doch derselb recht gmachet seÿ.
Ihr habt offt manchen hin gericht
Der aller gstalt ietz mir gleichsieht.
der Docter.
45
Ich hab mit meinem wasser bschauen,
Geholffen baiden man vnd frauen.
Wer bschaut mier nur daß wasser mein
Mich treibt der todt in rayen nein.
|
[der todt.]
49
Lasab kauffman von deinem werben,
Die Zeit ist hie ietz muest duch sterben.
Hast du schon ghabt vil sießer gschleckh,
Ietz wierts dier saur du muest hinweckh.
der Kauffman,
53
Mein haus thet ich fürsehen wol,
Mein küsten vnd kasten steckt ich vol.
Ietz so ich bin zum besten drin,
Mueß ich in disen todten ring.
|
[der todt]
57
Kunst hast abglernet Christo fein
Aus wasser hast du gmacht offt wein.
An einer maß zweÿ kreützer gwin,
Ist gar zu vil tantz hehr muest hin.
der würdt
61
Ich het zwar offt vil seltzam gest,
Ietz kompt der todt und ist der lest
Mit dem ich mir abrechnen mueß,
Für zech gibt er mir todten bueß.
|
[der todt]
65
Du wuocherer vnd Gottloser man,
Dein guet vnd gelt sich ich nit an.
Der armen leit hast vil verderbt
Ein schwartzer todt ist ietz dein gfert.
der Wuecherer.
69
Ich fragt nit vil nach Christi lehr,
Gedacht der wuecher trag vil mehr.
Ietz bleibt der bettel all dahinden,
Was hilfft mich ietz mein schaben vnd schinden.
|
[der todt.]
73
Hui auff o baur mit deinem knecht
Du muest mir halten auch ein gfecht.
Dein pflegel magst wol fallen lohn,
Zu vnserm tantz richt dich gar schon.
der baur.
77
Mein leben ward der arbait vol,
An meinen henden sieht mans wol
Das feld wolt ich doch lieber bauen,
Dan disen thirling ietz anschauen.
|
der todt,
81
Herr Abbt vor mir seit ihr nit gfreit,
Muest auch mit mir in todten streit.
Legt weckh den stab vnd Infel fein,
Kombt hehr eß mueß getantzet sein.
der Abbt.
85
Prelat ward ich in disem landt
Vnd hochgeacht in meinem standt.
Ietz kombt der todt was ist mein gwin,
Gott bhuet mein Kloster ich far dahin.
|
der todt.
89
O Junckher mitt dem knebelbartt,
Ewr rew habt ihr zu lang gespartt.
Ihr maintt es gang euch alleß hin,
Dantzt hehr mitt mir ist euer gwin.
der Jun[c]kher
93
In diser weltt waß ich bekantt
Dar Zu ein Edelman genantt.
Nun bin ich von dem todt gefeltt
Vnnd hehr an disen tantz gesteltt.
|
der todt,
97
O fraw waß sol doch diser prachtt,
Den ihr thuett fueren tag vnd nacht
Ziechtt ab daß klaidlen zartt vnd waich,
Vnd tantzt mit mir so werdt ihr blaich.
die Ed[e]lfraw,
101
Der todt kompt mir auch für die thür,
Es kompt mir graußam seltzam für.
Hab nit vermaint, daß noch sey Zeit,
Gar schnell hatt er mich übereiltt.
|
der todt.
105
Herr Pfarrer merckhtt auff euer lehr,
Kompt auch in meinen tantz hieher.
Ihr singt vnd sagt vil von dem todt,
Ihr muest erfaren auch die nott.
der Pfarrer.
109
Ich hab gepredigt offt vnd vil,
Daß keiner hab kein gwiseß zil.
Daß werckh probiertt den maister fein,
Drum lauff ich auch in reÿen nein.
|
der todt
113
Seitt ihr herr vogt und Amptman hie,
Kompt hehr, versuecht mein pfefferbrhue.
Mitt schanckh vnd schmieren ist eß auß
Kompt hehr mitt mir inß nobis hauß.
der Amptman.
117
Im Ampt hab ich nit braucht gewaltt
Daß ich thett waß in dienerß gstaltt.
Durch schankhung ward ich nit verfüert,
Doch mueß ich thon, waß dir geliebtt.
|
der todt.
121
Hupff auf du hessigs kammelthier,
Im fewr muest du ietz schwitzen schier.
Dein gabel reitten hat ein endt,
Vom hewberg hol ich dich gar gschwendt.
Die Vnholdt,
125
Gott selbst auch seine haÿlgen zwar,
Hab ich verlaugnet offenbar.
Mein glübt hab Ich dem teuffel thon
O weh o weh waß wiert mein lohn.
|
der todt.
129
Kom hehr spilgur, ietz ist dein Zil
Muest mitt mir thon ein seltzamß spil.
Wan du schon hast dreÿ beste thauß
Gwinst nichts darmitt dz spil ist auß.
der spiler
133
Ich hab verspiltt vil guett und geltt
Nun mueß ich fortt aus diser weltt.
Mein falschen list nit helffen thon,
Ich bsorg mir wird der spilerlohn.
|
der todt
137
O Junckfraw schaw dein rotter mundt
Wiertt blaich ietzundt zu diser stundt.
Hast offt getantzt mitt Jungen knaben,
Mitt mir muest ietz ein vortantz haben.
die Junckfraw.
141
O weh wie grewlich hast mich gfang,
Mir ist all muett vnd freud vergang
Hab eben gsintt nach einem man,
Ach vor der Zeit mueß ich ietz dran.
|
der todt.
145
Der Jugett thue ich nit verschonen,
Die kündlein nem ich wie die bluomen.
Kom hehr mein liebeß kündelein,
Vergiß der muetter ietz bist mein.
daß kündt,
149
Schaw schaw mein liebeß muetterlein
Do gehtt ein langer man herein.
Der zuicht mich fortt vnd wil mich hon
Mueß tantzen schon, vnd kan kaum gohn.
|
der todt.
153
Jacob hiebeler laß daß mahlen stohn,
Wirff bensel hin du muest daruon.
Hast du schon grewlich gmachtt mein leib,
Tantz hehr, muest mir ietz werden gleich.
der mahler.
157
Ich hab gemaltt den todtten tantz,
Mueß auch in spil, sonst werß nit gantz.
Ietz ist daß mein verdientter lohn,
Kompt allhernach ich mueß daruon.
Dances of death
Füssen
The text