Reynke de Vos, bog 1, kapitel 23

Hvordan kongen beordrede tavshed og lod Reynke komme ned fra stigen for at udspørge ham nærmere. Det XXIII. kapitel.

¶ Wo de konninck leet swygent beden vnde Reynken van der ledderen wedder affstygen, vp dat he ene beth vragede. Dat XXIII. ghesette.

2055 ALze de konnigynne van Reynken horde,
Dat he sprack van desseme morde,
De andrepende was ereme heren,
Se begunde syk seer to vorveren.
Se sprack: „ik vormane yw, Reynart,
2060 Vp de langen hennevart,
De yuwe sele nu varen schal,
Dat gy de warheyt seggen al,
Wo yd is vmme dessen mord."

¶ De konnynck sprack do alzo vort:
2065 „Men schal beden eynen yslyken to swygen
Vnde laten Reynken nedder stygen;
Desse sake gheyt my suluest an,
Dat ik de beth moghe vorstan."
Do krech Reynke eynen beteren moet
2070 Vp der ledderen, dar he stoet.
Se mosten en do alzo wedder
Affstygen laten van der ledder.
De konnynck nam en by syk allene,
Ok de konnygynne, vnde vrageden ene,
2075 Wo desse sake were ghetacht.
Ja, do wolde Reynke legen myt macht;
He dachte: „mochte ik nu wedder wynnen
Des konnynges hulde vnde der konnygynnen,
Vnde mochte dat dar to vorweruen,
2080 Dat ik desse alle mochte vorderuen,
De sus nu stan na myneme doet,
Vnde ik so queme vth desser noet,
Dat mochte ik reken vor grote bathe.
Men ik moet seer legen vthermathe."