|
Hir beghynnet dat ander boek van Reynken deme vosse.
¶ In desseme anderen bocke sprickt de poete sunderlyken van deme state der mynschen vnde ereme ghebreke. Vnde volget int erste, wo to deme houe des konnynges, den he heelt, quemen nicht alleyne de deren, men ock de vögele in groter vorsammelynge, klagende ouer Reynken, vnde spreken vnder syck, so hir na volget.
¶ „De konnynck heft vns to entboden,
Wy möten to houe, dat is van noden.
Nicht enhelpet Reynken meer syne kunst,
3250
He is groff in des konnynges vngunst."
¶ „So vele vnser is in deme tal,
Ouer Reynken wyl wy klagen al,
So wan wy komen in den hoff.
Dat heft he tegen vns vordenet groff."
3255
„Ja wy ock des ghelyck vnde vnse kynder,
Wente wy syner hebben groten hynder;
Vnse eyger vnde yungen he nummer enspart.
Des kricht he nu eyne quade vart."
„Ja, wy wyllen yw doen vast bystant,
3260
Vp dat he to degen werde gheschant
Vor syne loßheyt vnde valsche laghe,
Dar he vns mede schadet heft vele daghe."
„Ja, hadde wy eer vns sus besproken,
Wy hadden vns lange wol gewroken
3265
An Reynken, deme erlozen deue,
Wert he nu ghehangen, so gheschüt vns leue."
¶ „Ja, Reynke plecht to syn vorbolgen.
Men late vns vry vnse klage vorvolgen.
Den schaden, he vns to donde plecht,
3270
Dar vor kricht he nu syn rechte recht."
¶ „Ja, de konnynck heft dat ordel ghegeuen,
Reynke schal nicht lenger leuen.
Eme wert nu alle schande vorlenet;
Dat heft he vaken noch vordenet."
|
¶ Dat erste capittel desses anderen bokes spryckt van deme groten houe, den de konnynk helt, vnde wat mannygerhande dere vnde vögele dar quemen. Sunderlyken secht hir de poete van der kreyen efte karock vnde van deme kannynen, wo de dar quemen, klagende ouer Reynken.
3275
ALze de hof sus was bereyt,
So hir vor geschreuen steyt,
Vnde alle dinck was wol bestelt,
Dar quam to houe mannich helt.
De dere weren dar nicht alleyne,
3280
Men ok vele vögele, grot vnde kleyne.
Dar quam to houe mannich here
To Ysegrymes vnde to Brunen ere.
Dar was vraude myt groteme feste,
Men heelt dar blytschop de alder beste,
3285
De ye wart gheseen van deren.
Men dantzede den hoffdantz by manneren
Myt trumpen vnde myt schalmeyden.
De konnynck hadde laten bereyden,
Dat eyn yslyck ghenoch dar vant.
3290
Alle was en boden ghesant,
Dat se mosten komen dar.
Vöghele vnde dere, mannich par,
Reyseden dar hen by daghe vnde nachte.
Men Reynke de vos lach vp der wachte,
3295
De valsche pelegrym vnde loze wycht
Quam de tyd to houe nicht.
He brukede al syn olde speel;
De eme danckeden, der en was nicht veel.
Dar was to houe mannich sanck,
3300
De spyse vloyede vnde de dranck,
Dar sachmen schermen vnde vechten.
Eyn yslyk quam myt synen slechten.
Eyn deel dantzeden, eyn deel de sungen,
Dar sachmen pypen vnde bungen.
3305
De konnynck sach van syneme sael,
Eme haghede seer wol de grote grael.
¶ Do achte daghe al vmme weren,
De konnynck sath myt synen heren
Ouer tafelen vnde ath.
3310
Dat kannyn quam vor en, dar he sath
By syner vrouwen, de konnygynne,
Vnde sprack myt eyneme drouygen synne:
„Here, her konnynck vnde al, de hir syn,
Entfermet yw by der klaghe myn!
3315
Ick mene, men selden heft ghehord
Sodan vorradent vnde argen mord,
Alze Reynke an my beghunde.
Gysteren morgen tor sesten stunde
Do sath Reynke vor syneme huß,
3320
Vor syner borch to Malepertuß.
Ick meende myt freden vor em to ghan,
Ick sach en alze eynen pelegrym stan.
My duchte, dat he syne tyde las,
Dar vmme ick des to dryster was.
3325
De suluen straten moste ick dorch,
Wolde ick wesen to desser borch.
Do he my sus hadde vornomen,
Beghunde he my neger to komen.
Ik dachte, he wolde my vruntlyk möten;
3330
Do greep he my an myt synen poten,
He tastede my an twysschen myne oren:
Ick meende, ik hadde myn höuet vorloren.
Syne klawen weren lanck vnde scharp,
Dar myt he my tor erden warp.
3335
Men (des weet ick gode danck!)
Ik was so lycht, dat ick entspranck
Vnde sus vth synen poten quam.
He grymmede seer vnde was gantz gram,
Dar vmme he my nicht beholden mochte.
3340
Ick swech vnde makede altes neen gherochte,
Doch moste ick myn eyne oor dar laten
Vnde in myneme höuede IIII grote ghaten.
Hir moghe gy seen dyt vnghevoch,
Dar he my myt synen klawen sloch.
3345
Vyl na hadde ick ghebleuen doet.
Here, latet yw entfermen desse noet,
Datmen alzus bryckt yuwe gheleyde.
We is, de varen dor ouer de heyde,
Nu Reynke alzus de strate belecht?"
3350
¶ DO he dyt sus hadde ghesecht,
Quam dar Merkenauwe de kreye vord
Vnde sprack to deme konnynck desse word:
„Werdyghe konnynck, gnedighe here,
Ick brynge yw yammerlyke mere.
3355
Van anxste kan ick nicht vele spreken,
My duncket, my wyl myn herte tobreken.
Is dat nicht eyn yammerlyck dynck?
Hüden morgen, do ick vthghynck
Myt Scharpenebbe, myneme wyue,
3360
Dar lach ghelyck eyneme doden ketyue
Reynke de voß vp der heyde
Vnde hadde syne ogen vorkeret al beyde;
De tunge henck eme vth syneme munde
Ghelyck so eyneme doden hunde,
3365
Eme stunt de munt wyde open.
Van anxste beghunde ick to ropen.
Jo meer ick reep, yo stylre he lach.
Wo vaken sprack ick: „owy vnde owach!
He is alderdynge doet!"
3370
Dar vmme hadde ick ruwe groet,
So seer my synes dodes entfermde.
Ick beklagede en, vnde myn wyff de kermde;
Meer ruwe hadde wy, wan yennich löuet.
Ick betastede synen buek vnde ock syn höuet;
3375
Myn wyff ghynck staen to syneme kynne,
Se merkede, eft ycht were dar ynne
Tekene des leuendes, groet efte kleyn,
Men he lach doet alze eyn steyn;
Dyt hadde wy beyde wol ghesworen.
3380
Wo se voer, dat moghe gy nu horen.
Do se in sorgen sus by eme stunt
Vnde er höuet helt by syneme munt,
He merkede, dat se syck nicht enhodde;
He greep se an, ya, dat se blodde,
3385
Vnde spleet er ock vort aff dat höuet.
Ick vorschreckede my mer, wan yennich löuet.
Ick schryede lude: „owy, owy!"
Do schot he vp vnde snauwede na my,
Men ick entfloch em myt anxste groet,
3390
Anders were ick ock dar ghebleuen doet;
So nauwe was yd, dat ick entquam.
Vp eynen boem de vlucht ick nam
Vnde sach van verne, wo desse ketyff
Stunt vnde ath myn gude wyff.
3395
He was so hungerich, so duchte my do,
He hadde noch wol twey ghegetten dar to:
He leet nicht na wer knoken efte been.
Do ick dessen yammer hadde gheseen,
Dat he dar nicht hadde ghelaten
3400
Vnde he wech leep syne straten,
Ick floch dar, wol was yd my to wedderen:
Dar vant ick noch etlyke vedderen
Van myneme wyue Scharpenebben,
Vp dat ick de myt my mochte hebben
3405
Vnde mochte de wysen yuwen gnaden.
Latet yw entfermen desses groten schaden!
Here, do gy hir aff neyne wrake
Vnde achte gy nicht desse sake,
Dat sus yuwe gheleyde wert ghebroken,
3410
Gy werden seer dar vmme vorsproken.
Men sprickt: „de is mede schuldich der daet,
De nicht enstraffet de myssedaet,
Vnde eyn yslyck wyl dan wesen here."
Dyt were to na yuwer vorstlyken ere."
¶ Wo de konnynck na der klage des kannynen vnde der kreyen syck tornede vnde wat he sprack. Dat ander capittel
3415
DO alzus der kreyen word
Vnde ok des kannynen weren ghehord,
Alze se er klage sus hadden vormelt,
Nobel de konnink wart sere vorgrelt.
He sprack in torne: „by myner truwen,
3420
De ick schuldich byn myner vruwen,
Ick wyl dyt quade so erlyck wreken,
Datmen dar lange schal aff spreken,
Dat myn gheleyde vnde myn gheboth
Sus is tobroken. Ick was eyn soth,
3425
Dat ick dessen schalken voß
So wyllygen hebbe ghelaten loß
Vnde ik syner loggen so löuede,
Dar mede he my so lystygen schöuede.
Ick makede eynen pelegrym van em,
3430
He scholde hen to Yherusalem.
Wo klauwede he my vp der mouwen!
Men de schult was by myner vrouwen,
Doch ick byn des alleyne nicht,
De by vrouwen rade schaden krycht.
3435
Late ick Reynken lenger betemen,
Alle wy moten vns des schemen.
Id is to malen eyn slymmen droch,
So was he to yar, so is he noch.
Gy heren, dencket dar vp myt vlyt,
3440
Wo wy ene krygen in korter tyd.
Nicht en kan he vns entghan,
Wyl wy dat ernstlyck grypen an."
|
¶ Wo de konninck rede makede in torne myt alle den deren vnde vöghelen, vnde wolde Reynken söken, vnde wo dyt Ysegryme vnde Brunen seer wol behaghede. Dat III. capittel.
YSegrym vnde Brune, desse beyde
Behagede wol, wat de konnink sede.
3445
Se hopeden noch werden ghewroken
An Reynken, konden se yd tostoken;
Men se endorsten nicht spreken eyn word.
De konnynck was so sere vorstord
Vnde was seer tornich in alle syneme synne.
3450
Int leste sprack de konnygynne:
„Ick bydde yw, konnynck, myn gnedyghe here,
Tornet yw doch nicht so sere!
Gy scholen ock nicht so lychte sweren,
Vp dat gy blyuen by macht vnde eren.
3455
Noch wette gy nicht waraftyghe sake,
Ock horde gy noch nicht de weddersprake.
Were Reynke nu hir tor stede,
Vyllichte hir weren wol mynre rede
Van den, de nu klagen ouer em.
3460
Audi alteram partem!
He klaget vaken, de suluen myßdoet.
Ick heelt Reynken wyß vnde vroet,
Ick hodde my nicht vor desseme rochte,
Dar vmme halp ick eme, dat ick mochte.
3465
Dat dede ick, here, alle dorch yuwen vromen,
Wo wol yd nu is anders ghekomen.
Is he quad efte is he gud,
He is van rade wyß vnde vroet,
Dar to ock van groteme gheslechte.
3470
Hir vmme, here, bedencket yd rechte,
Dat gy nicht vorhasten yuwe ere.
Gy synt yo al des landes eyn here,
Reynke kan vor yw nicht blyuen;
Wylle gy ene vangen edder entlyuen,
3475
Juwe ordel moed yummer ghan."
¶ Do sprack de lupard wedder an:
„Here, dat kan yw nergen ane schaden,
Dat gy erst Reynken to worden staden.
Wat schadet, dat gy ene horen erst spreken?
3480
Gy mogen denne doch yw an eme wreken.
Dar vmme volget yuwer vrouwen rad
Vnde ock der heren, de hir stad."
¶ Isegrym sprack: „dat en kan nicht schaden,
Dat wy des besten helpen raden.
3485
Her lupard, höret my wes mede!
Al were Reynke hir vort tor stede
Vnde he syck der sake konde entleggen,
De desse twey hir vp eme seggen,
Ick wyl eyne sake doch bryngen vort,
3490
Dar he syn lyff heft mede vorbord.
Men nu wyl ick der suluen swygen
So lange, wy ene hir wedder krygen.
Des heft he bouen alle dat
Deme konnynck ghewyset eynen schat
3495
In Husterlo by Krekelput,
Dat noch grotter loggen is dan dyt.
He heft der loggen vele ghelogen,
Dar to heft he vns allen bedrogen,
He heft Brunen sere gheschendet vnde my.
3500
Dar wyl ik myn lyff noch setten by:
Newerlde he recht de warheyt sede.
Nu rouet vnde mordet he vp der heyde.
Wes deme konnynge vnde yw duncket gud,
Dat is byllick, datmen alzo doet.
3506
Men hadde he hir wyllen to komen,
He heft de mere wol vornomen
Vth des konnynges houe by synen boden."
¶ De konnynck sprack: „wat is dat van nöden,
Dat wy alle hir na eme beyden?
3510
Ick ghebede, gy scholen yw alle bereyden
Vnde volgen my in deme sesten dage.
Ik wyl eynen ende hebben der klage.
Wo duncket yw van deme vulen wychte?
He makede wol eyn lant to nichte.
3515
Maket rede, al dat gy moghen,
Myt yuweme harnsche, spete vnde boghen,
Myt donrebussen, pollexen vnde barden.
Ick ghebede, dat gy so vp my warden,
Eft ick yuwer welke to rydder sloghe,
3520
Dat de den namen myt eren droghe.
Wy wyllen hen vor Malepertuß
Vnde seen, wat Reynke heft in deme huß."
¶ Se antworden deme konnynge alle: „ya,
Wan gy ghebeden, so volge wy na."
|
¶ Wo de greuynck leep to Reynken vnde en warnede vnde vormeldede eme den rad, de ouer en was gheghan. Dat IIII. capittel.
3525
ALse desse rad sus was ghesloten,
Dat de konnynck vnde syne ghenoten
Wolden theen vor Reynken huß,
Vor dat slot Malepertuß,
Grymbart was mede in deme rade.
3530
He leep hastygen vnde drade
Na Reynken slot al dat he mochte,
Vp dat he eme de tydynge brochte.
He beklagede ene vnde sprack yo vaken:
„Och, Reynke oem, nu wylt syck maken!
3535
Du byst dat höuet van vnseme gheslecht,
Wy mogen dy wol beklagen myt recht.
Wente wan du plechst vor vns to spreken,
So enkonde vns nicht entbreken,
So schone kanstu dyne fallacien."
3540
Myt sus groter lamentacien
Quam he to Malepertuß ghegaen
Vnde vant Reynken dar buten staen.
He hadde vangen twey duuen yunge,
Dar se to ereme ersten sprunge
3545
Vth ereme neste vlegen wolden;
Se vellen vnde konden syck nicht entholden,
Wente ere vedderen weren noch to kort.
Reynke sach dyt vnde greep se vort,
Wente he vaken vmme yacht vthghynck.
3550
Sus sach he komen den greuynck.
He vorbeydede syner vnde sprack ene an:
„Wylkome, neue, vor yennygen man,
Den ick in myneme slechte weet.
Gy lopen so sere, dat gy sweet
3555
Wat hebbe gy nyes vornomen?"
Grymbart sprack: „ick byn ghekomen,
Dat yck yw tydynge mochte bryngen,
Wo wol se is van quaden dyngen.
Lyff vnde gud is al vorloren.
3560
De konnynck suluen heft ghesworen,
He wyl yw laten schendyghen doden
Vnde heft al vmme heer gheboden,
Hir to wesen na ses daghen
Myt bogen, myt swerden, bussen vnde wagen.
3565
Al raden se to yuweme schaden.
Hir moghe gy kortes yw vp beraden,
Wente Ysegrym vnde Brune syn nu
Beth by deme konnynge, dan ick by yw.
Al dat se wyllen, dat is ghedan.
3570
Isegrym heft eme laten vorstan,
Dat gy eyn morder vnde rouer syd.
He drecht vp yw so groten nyd,
He wert marschalk noch eer deme meye.
Ock heft dat kannyn vnde ock de kreye
3575
Vp yw so grote klage ghedregen,
Ik sorge vor yuwe leuent to degen,
Isset, dat yw de konnynck kricht."
¶ „Schyt!" sprack Reynke, „ysset anders nicht,
Dat is wol eyner bonen werd.
3580
Sy gy dar van so seer vorverd?
Al hadde de konnynck noch meer ghesworen
Vnde al, de to syneme rade horen,
Wan ick my suluen rad wyl gheuen,
Ick werde noch bouen se alle vorheuen:
3585
Se mogen vele raden, we yd ok sy;
Men dat höuet en doch nicht ane my.
Latet dat men varen, leue neue,
Komet in vnde seed, wat ik yw gheue:
Eyn par duuen, yunck vnde veth.
3590
Ick en mach ock neene spyse beth,
Wente se synt gud to vordauwen.
Men mach se sluken sunder kauwen,
Vnde de knokschen smecken so soet,
Id is halff melck vnde halff bloet;
3595
Wente ick ethe gherne lychte spyse,
Myn wyff holt ock de suluen wyse.
Komet in, se wert vns wol entfaen.
Men dyt enlatet er nicht vorstaen
Van der sake, dat holdet vorborgen.
3600
Se is alto depe van sorgen,
Van kleener sake valt se in vare,
Se is van herten alto sware.
Morgen wylle wy to houe ghan.
Leue oem, wylle gy ok by my stan,
3605
Alze eyn oem deme anderen doet?"
¶ Grymbart sprak: „ya, lyff vnde gud
Is to yuwer behoff myt flyt."
¶ Reynke sprack: „danck hebbet alle tyd!
Mach ick leuen, yd schal yw vromen."
3610
¶ Grymbart sprack: „oem, gy mogen wol komen
Vor de heren vmme yuwe sake
Vnde vorantworden yw myt gudeme ghemake.
Wente de lupard sprack dessen rad,
Dat nemant yw doen schal quad,
3615
Eer gy suluen yuwe worde dar
Hebben ghesproken openbar.
Dyt sulfte sprack ock de konnygynne.
Dat moghe gy mede nemen to synne."
¶ Reynke sprack: „wat schadet my dan,
3620
Wan my de konnynck des so ghan?
Ik hope, yd schal my noch vromen,
Mach ick myt eme to sprake komen."
Myt des Reynke bynnen ghynck.
Syn wyff se beyde wol entfynck:
3625
Se bereyde de spyse al dat se mochte,
De duuen, de Reynke mede brochte.
Eyn yslyck syn deel dar van ath.
Noch worden se nicht gantz sath;
Hadde der duuen meer ghewesen,
3630
Islyk hadde noch wol twey vpghelesen.
¶ Wo Reynke sprack van synen kynderen vnde den anderen dach vortghynck myt deme greuynge na des konnynges hoff. Dat V. capittel.
Do sprack Reynke to Grymbard:
„Seet, oem, dyt is de rechte ard.
Wo behagen yw desse kynder myn
Alze Rosseel vnde Reynardyn?
3635
Se werden vnse slechte vormeren.
Se beghynnen syck alrede to gheneren:
De eyne vanget eyn hoen, de ander eyn küken;
Se konen ock wol int water duken
Na kyuyten vnde ock na enden.
3640
Ik mochte se wol vakener vmme yacht vt senden,
Men ick wyl se ersten leren vroden,
Wo se syk mogen wyßlyken höden
Vor de strycke, vor de yegers vnde hunden.
Wan se de art wol vorstunden,
3645
So hadde ick se wol togherust;
Se scholden vaken vnsen lust
Van mannygerhande spyse böten,
De wy van nöden hebben möten.
Vnde se slachten na my seer vele,
3650
Wente grymmende spelen se er spele
Vppe de, de se vorhaten;
De konen nicht an ene baten:
Se byten der vele entwey de kele.
Dyt is de ard van Reynkens spele;
3655
Er grypent is ock myt hastyger vard.
Dyt duncket my syn de rechte ard."
¶ Grymbart sprack: „yd is eyne ere.
Eyn yslyck mach syck vrouwen sere,
De kynder heft na syneme synne,
3660
De sus mede synt na ghewynne.
Ick vrauwes my sere, vff myn eyd,
Dat ick se in myneme slechte weyd."
¶ „Dyt wylle wy nu sus laten staen",
Sprack Reynke, „vnde wyllen slapen ghan.
3665
Gy synt mode, Grymbart vrunt."
Sus ghyngen se slapen tor suluen stunt
Vp den sael, ghevlegen myt hoye,
Reynke, syn wyff vnde alle de proye.
Reynke was in anxste groet.
3670
He dachte, gud rad were nu wol noet.
Sus lach he in dancken besward
So lange, dat yd morgen ward.
Do sprack he syneme wyue to
Vnde sede: „vrouwe, weset nicht vnvro,
3675
Wente Grymbart heft my laten vorstan,
Ick moet myt eme to houe ghan.
Doch bydde ik, weset wol to frede.
Eft yw yemant van my wat sede,
Keret dat al in dat beste
3680
Vnde vorwaret wol vnse veste."
¶ Se antworde eme vnde sprack alzo:
„Reynke, wat nödyget yw dar to?
Dat is yo eyn seltzen dynck!
Wette gy, wo yd yw latest dar ghynck?"
3685
¶ Reynke sprack: „yd is yummer waer,
Ick was do suluest in groter vaer,
Etlyke weren my nicht seer holt.
Doch dat euentür is mannichfolt:
Id gheyt sumtydes buten gyssen,
3690
De yd menet to hebben, moet des myssen.
Ick moet yummer dar wesen nu.
Weset to vreden, des bydde ik yw,
Wente yd is al sunder anxst.
Ik kome wedder vppet alder langest
3695
Bynnen vyff dagen, ysset, dat ik kan."
Hir mede scheyden se van dan.
¶ Wo Reynke myt syneme ome, deme greuynge, echt ghynck to deme houe des konnynges vnde wo Reynke bychtede. Dat VI. capittel.
REynke vnde Grymbart, de beyde,
Ghyngen to samende ouer de heyde
Na des konninges slot de rechten straten.
3700
„Id mach my schaden, yd mach my baten",
Sprack Reynke, „efte dyt my sus slumpt,
Dat my desse reyse tom besten kumpt!
Doch, leue oem, horet my nu!
Synt latesten, dat ik bychtede tegen yw,
3705
Horet vorder myne sunde, groet vnde kleyn.
Eft ick my sodder wes hebbe vor seyn,
Dat werde ick yw seggen in desser stunde.
Ick leet Brunen eyne grote wunde
Snyden van syneme velle vnde lyue.
3710
Ik leet deme wulue vnde syneme wyue
De scho van ören vöten vyllen.
Dyt dede ik al dorch hates wyllen.
Myt myner loggen schaffede ik dat,
Dat en de konnynck wart seer hath.
3715
Ick bedroch den konnynck to voren an
Meer, wan ick nu seggen kan.
Ick fynsede vnde sede em van eyneme schat,
Men he en heft des noch nicht lange ghehat.
Lampen ick syn lyff affrouede
3720
Vnde sande Bellyn myt syneme höuede,
Dar myt he krech des konnynges torn.
Ick duwede dem kannyn so twysschen de orn,
Dat ick em vyl na dat leuent nam;
Id was my leet, dat yd wech quam.
3725
¶ Noch wyl ick seggen twyerleye.
Myt rechte klaget ouer my de kreye:
Ik ath syn wyff, vrouwe Scharpenebbe.
Dyt ysset, dat ick bedreuen hebbe
Sodder myner lesten bycht.
3730
Noch hebbe ick eyn dynck vthgericht,
Dat ik latesten hadde vorgetten
(Leue om, dat schole gy ok wetten)
Vnde wyl dat nu ok seggen mede.
Id was eyne hornscheyt, de ick dede;
3735
Ick wolde nicht gherne, dat my dat sulue
Schege, dat ick dede deme wulue.
Wente wy beyden vp eyne tyd ghyngen
Twysschen Kackyß vnde Eluerdyngen;
Dar ghynck eyne merye myt ereme volen,
3740
De beyde swart weren alze de kolen.
Dat volen mochte wol olt syn
Van veer maenden, nicht vele myn.
Isegrym was vyl na doet,
Van hungers wegen leet he noet.
3745
He bath my, dat ick vragen scholde,
Efte de merye vorkopen wolde
Ere volen, vnde ock wo düre.
Sus ghynck ick to er vp euentüre.
Ik sprack: „segget my, merye vruwe,
3750
Ick weet, dat dyt volen is yuwe;
Wyl gy yd vorkopen? segget my dat!"
Se sprack: "ya, ick vorkopet vmme schat.
De summe, dar ik dat vmme wyl gheuen,
Steyt achter vnder myneme voete gheschreuen.
3755
Wylle gy yd seen, ik latet yw lesen."
Do horde ik wol, wor se wolde wesen.
Ik sprack: „neen, vruwe, des syd bericht,
Lesen eft schriuen kan ick nicht.
Juwes kyndes ick ock nicht enbeghere,
3760
Men Ysegrym wuste gerne, wo yd were;
De heft my heer ghesant to yw."
Do sprack se: „so laet ene komen nu,
So wyl ick eme des maken vroet."
Do ghynck ick hen, dar Ysegryme stoet.
3765
Ik sprack: „wyl gy yw ethen sath?
De merye secht vnde entbuth yw dat:
Dat ghelt steyt vnder ereme vothe schreuen,
Wor se dat volen wyl vmme gheuen.
Se woldet my hebben lesen laten,
3770
Men wat scholde my dat baten?
Wente ick yo nene schrift enweet.
Des lyde ick vaken groet vordreet.
Om, seet, eft gy dat konnen lesen."
¶ Isegrym sprack: „wat scholde dat wesen,
3775
Dat ik nicht scholde lesen, wat yd ock sy?
Ja, düdesch, walsch, latin, ok franßoß dar by.
Hebbe ick doch to Erfort de schole gheholden!
Ock hebbe ick myt den wysen olden,
Alze myt den mesters van der audiencien,
3780
Questien ghegeuen vnde sentencien.
Ick was in loye ghelicencieret.
So wat schriftur, datmen viseret,
Kan ik lesen ghelyck myneme namen.
Dar vmme wyl ick wol mede toramen.
3785
Beydet myner hir eyn kleyn,
Ik wyl ghan vnde de schrift beseen."
He ghynck hen vnde vragede euen,
Wo se dat volen wolde gheuen.
He vragede na deme besten kope.
3790
Se sprack: „dat gelt steyt to hope
Gheschreuen vnder myneme achteren voet."
He sprack: „laet seen!" se sprack: „ik doet."
Se borde den voet vp bouen dat gras,
De nye myt yseren beslagen was,
3795
Myt ses hofnagelen, vnde sloch wysse
Vnde rakede ock nicht al mysse,
Wente se sloch ene so vor syn höuet,
Dat he storte vnde lach vordöuet
Vnde vel vor doet tor erden nedder.
3800
Eer he syck recht vorhalede wedder,
Dat was wol eyne grote stunde.
De merye leep wech, al dat se konde,
Vnde leet Ysegryme lyggen vorwunt.
He lach vnde hulede alze eyn hunt.
3805
Ick ghynck to eme vnde heet ene here,
Ick vragede ene: „wor is de mere?
Synt gy van deme volen ock sath?
Wor vmme delede gy my nicht ock wat,
Wente ick yw doch de bodeschop dede?
3810
Hebbe gy vp yuwe maltyd gheslapen rede?
Wat was yd vor schrift vnder deme voet?
Wente gy synt in wyßheyt seer vroet."
¶ „Och Reynke", sprack he, „spottet doch nicht!
Ick byn ghevaren so eyn arm wycht.
3815
Dat mochte entfermen eyneme steen.
De hore myt deme langen been,
Myt yseren was beslagen er voet,
Id was neen schrift, de dar vnder stoet.
De nagelen, de dar ynne stunden,
3820
Dar myt sloch se my ses grote wunden."
¶ Hir van Ysegrym nauwe syn lyff behelt.
Seet, neue, nu hebbe ick yw vortelt
Al wat ick weet van myner myssedaet.
Id is myslyck, wo yd my nu gaet
3825
To houe; wente nu byn ick sunder vaer
Vnde dar to van mynen sunden klaer.
Ick wyl ock gherne by yuweme rade
Beteren vnde komen wedder to gnade."
¶ Wo Reynke noch bychtet vnde etlyke sunde entschuldygen wyl vmme quader exempele der prelaten. Dat VII. capittel.
GRimbart sprak: „yuwe sunde sint grod.
3830
De doet is, moet blyuen dod;
Dat were gud, mochten se noch leuen.
Men, om, dyt wyl ik yw vorgeuen
Vmme den anxst vnde vmme de noet,
Wente se stan vast na yuweme doet.
3835
Hir wyl ik yw absolueren van.
Men dat meyste, dat yw hynderen kan,
Is Lampen houet vnde syn doet.
Juwe drysticheyt, de was seer groet,
Dat gy deme konnynck sanden dat houet;
3840
Dat wyl yw meer schaden, wan gy löuet."
¶ „Neen, schyt", sprack Reynke, „nicht eyn haer!
Oem, ick segge yw dat vorwaer,
De nu dorch de werlt schal varen,
De en kan syck nicht so hyllych bewaren,
3845
Alze de in eyn kloster höret.
Ick wart van Lampen so seer beköret,
He spranck vor my vnde was wol veth
Sus wart de leue to rugge gheseth.
Bellyne ick ok nicht seer wol gunde.
3850
Sus hebben se den schaden vnde ik de sunde.
Se synt ock eyn deel so rechte plump,
In allen saken groff vnde stump.
Ick scholde do vele myt en credencien?
Des hadde ik do nene grote conciencien,
3855
Wente ick myt anxste scheyde vth dem hoff.
Ick vnderwysde se, men yd was to groff.
Ick schal yo leff hebben myn ghelyken;
Wente der warheyt kan ick nicht entwyken:
Der en achtede ick do nicht seer groet.
3860
Doch de doet is, mod blyuen doet;
So spreke gy suluen vp der stede.
Lathet vns seggen van anderer rede!
¶ Id is nu eyne varlyke tyd;
Wente de prelaten, de nu syd,
3865
Se ghan vns vore, so men mach seen.
Dyt merke wy anderen, groet vnde kleen.
We is, de des nicht enlouet,
Dat de konnynck ok nicht mede rouet?
Ja, ysset, dat he yd nicht en nympt suluen,
3870
He leth yd doch halen by baren vnde wuluen.
Doch menet he al, he doet myt recht.
Neen is, de eme de warheyt secht
Edder de dor spreken: „yd is ouel ghedan",
Nicht syn bychtfader, noch de kapellan.
3875
Wor vmme? wente se ghenetens al mede,
Al were yd ock men to eyneme klede.
Wyl yemant komen vnde wyl klagen,
Ja, he mach vuste nayagen,
He vorspyldet men vnnutte tyd.
3880
Watmen eme nympt, des is he quyd,
Syne klage wert nicht vele ghehord,
He dor int leste nicht spreken eyn word.
Wente desses is he stedes andechtich,
Dat em de konnynck is to mechtich.
3885
¶ Wente de lauwe is yo vnse here
Vnde holt yd al vor grote ere,
Wat he to syk rapen kan.
He sprickt, wy syn alle syne man.
Dat is noch neyne grote eddelycheyt,
3890
Dat he den vndersaten schaden deyt.
Seet, oem, wan ick yd seggen dorste,
De konnynck is eyn eddel vorste,
Men he heft leeff den, de eme vele brynget
Vnde de so dantzet, alze he vore synget.
3895
Id en is noch nicht al so klare,
Dat nu de wulff vnde ok de bare
Myt deme konnynge wedder ghan to raden;
Dat wyl noch mannygem sere schaden.
He seth vppe se groten louen,
3900
Se konnen vele stelen vnde rouen,
Eyn yslyk denne mede stylle swycht.
Id is alleyns, wo men dat kricht.
Sus heft de lauwe nu, vnse here,
Desser meer by syk, dan vere;
3905
De stan nu seer in syneme loue
Vnde synt de grotsten in syneme houe.
Arm man Reynke, nympt de men eyn hoen,
Dar wylt se alle denne vele vmme doen,
Den wylt se denne soeken vnde vangen,
3910
Ja, se ropen alle, men schal ene hangen.
De kleynen deue hengtmen wech,
De groten hebben nu starck vorhech.
De mothen vorstaen borghe vnde lant.
Seet, oem, so ick dyt hebbe bekant
3915
Vnde wan my dyt kumpt to synne,
So spele ick ok na myneme ghewynne.
Ik dencke vaken, yd is so recht.
Wente men nu des vele plecht.
Doch vrage ick vaken myne conciencien
3920
Vnde dencke denne vp godes sentencien,
(Datmen vnrecht gud, wo kleyn yd ok is,
Wedder gheuen mod, dat is wys)
So kome ick denne to groter ruwe.
Men nicht lange ick hir vp buwe,
3925
Wan ik see der prelaten stad,
De etlyker wegen nu is seer quad.
Doch synt vele prelaten in deme talle,
De doch gherechticheyt beleuen alle.
Dyt were wol best, konde ik my vorwynnen,
3930
Dat ik den volgede myt al mynen synnen."
¶ Noch van Reynken bycht, vnde is eyne straffynge veler quaden vnde eyn loff der guden. Dat VIII. ghesette.
Seet, Grymbart om", sprak Reynke vordan,
„De nu dorch de werlt mod ghan
Vnde suet alzo der prelaten stad,
(Eyn deel syn gud, eyn deel syn quad)
3935
He vallet in sunde, eer he yd weet,
Wan he deme bözen nicht weddersteyt.
Vele prelaten synt gud vnde gherecht,
Noch blyuen se darvmme nicht vmbesecht
Van der meenheyt in dessen daghen,
3940
De nu dat quade erst konnen vthvragen
Vnde se ok dar nicht by vorgetten
Vnde konnen ock dar meer tosetten.
So böze is nu ok de meenheyt.
Darvmme yd sus ok vaken gheyt,
3945
Dat vele nu nicht syn werdich
To hebbende heren gut vnde rechtferdich.
Dat quade se vaken spreken vnde syngen;
Men wetten se wat van guden dyngen
Van welken heren, groet efte kleyn,
3950
Dat wert vorswegen int ghemeyn;
Nicht spreken se dat so draden ouerlud.
Wo scholde yummer der werlt scheen gud?
De werlt is vul van achterklapperye,
Vul loggen, vul vntruwe, vul deuerye.
3955
Vorradent, valsche ede, roeff vnde mord,
Alsodanes wert nu gantz vele ghehort.
Valsche profeten, valsche ypocriten,
Ja, desse de werlt nu meyst beschyten.
De meenheyt süd der prelaten stad,
3960
De vormenget syn beyde gud vnde quad.
Nicht volgen se den guden, men den quaden.
Dar myt se syk meyst suluen vorraden.
Werden se ghestraffet vmme de sunde,
Se spreken vort tor suluen stunde:
3965
„Nicht en syn de sunde so swar,
Alze de ghelerden prediken hir efte dar
Wan dat so were", sprikt mannich arm wycht,
„De papen deden dat suluen nicht."
Se entschuldygen syck myt den quaden papen,
3970
Dar myt se ghelykent synt der apen,
De na wyl doen, wat se suet,
Dar vmme er vaken neen gud enschuet.
¶ Id is waer, vele papen syn in Lomberdyen,
De ghemeenlyken hebben ere egene amyen;
3975
Men nicht en syn de in desseme lande.
Desse dryuen vele sunde vnde schande:
Se ghewynnen kyndere, so my is ghesecht,
Alze andere mynschen doen in deme echt.
Se dencken denne meyst der kyndere bate
3980
Vnde bryngen se ok to groteme state.
Anderen gheuen se des nicht to voren,
Wo wol se syn vnechte gheboren.
Se ghan heer stolt, so vprichtygen recht,
Ja, eft se weren van eddelem gheslecht.
3985
Se menen suluen, ere sake sy slycht.
Men en plach der papen kynder nicht
So vor to teende vnde to eren,
Men nu hetet men se vruwen vnde heren.
Dat ghelt heft nu de oueren hant.
3990
Men vyndet nu selden eynes vorsten lant,
Dar nicht de papen boren den tollen;
Se raden ouer dorpere vnde mollen.
Desse de werlt erst vorkeren.
Wan sus de meenheyt dat quadeste leren
3995
Vnde seen, dat desse sus hebben wyuer,
So sundygen se myt en des to ryuer.
Eyn blynde sus den anderen leydet,
Vnde werden sus beyde van gode ghescheydet.
Nicht en wert nu in desser tyd
4000
Ghemerket myt so groteme vlyt,
Watmen suet van guden werken
Van vromen presteren in der hylgen kerken,
De vele guder exempele gheuen.
Weynich nu na dessen leuen,
4005
Vnde dyt wert nicht so draden ghemerket.
Men dat quade wert meyst ghesterket,
Dat nu sus gheschüd manckt der ghemeen.
Wo scholde der werlt gud ghescheen?
Doch spreke ik vorder, wyl gy yd horen:
4010
De alzus in vnechte is gheboren,
De hebbe hir ynne gude ghedult,
Wente he heft hir ane nene schult.
Men dat ik hir mene, dat is dyt.
De sus is, de othmodyghe syk myt vlyt;
4015
Nicht schal he bouen andere vthbreken,
Datmen nicht van en dorue spreken
So alze hir vor is ghesecht.
Sprickt yemant dan vp se, de deyt vnrecht.
De ghebort maket nicht vneddel efte gud,
4020
Men döghede efte vndoget, de yslyk doet.
¶ Eyn gud pape, wol ghelerd,
De is aller ere werd;
Men eyn ander van quadem leuen,
De kan vele quader exempele gheuen.
4025
Prediket ock sodanen vaken dat beste,
So spreken doch de leyen int leste:
„Wat ysset, dat desse predyket eft leret,
Wente he suluen is vorkeret?
Der kerken deyt he suluen neen gud,
4030
Men to vns sprickt he: „ya, legget men vth!
Buwet de kerken, dat is myn raet,
So vordene. gy gnade vnde afflaet. "
Ja, synen sermoen slut he alzo,
Suluen lecht he dar weynich to
4035
Edder ock wol nichtes myt allen,
Scholde ock de kerke dar nedder vallen."
Sodanen holt dyt vor de [beste] wyse:
Schone kledere vnde leckere spyse,
Grote bekummerynge myt wertlyken dyngen.
4040
Wat kan sodanen beden efte syngen?
Men gude presters, de dencken alle tyd,
Wo se gode mogen denen myt flyd
Myt velen hylgen guden werken.
Desse synt nutte der hylgen kerken,
4045
Desse ghan den leyen best vore
Vnde bryngen se in de rechten dore.
¶ De bekappeden, de ock myt alleme vlyd
Bydden, [vnde] gylen alle ere tyd,
De mene ik hir mede in deme suluen ghelyken.
4050
Meyst synt se leuer by den ryken;
Se konen ere worde so lystygen kleden
Vnde alto lycht synt se ghebeden:
Byddetmen eynen, so komen dar twey.
Noch synt to dessen twey efte drey
4055
In deme kloster best van worden;
Desse werden vorhauen in deme orden
To lesemester, custode, prior efte gardian,
De anderen möten by syden stan.
So wan men dar to reuenter eth,
4060
Vnlyke werden de schottelen gheseth;
Wente desse moten des nachtes vpstan,
Syngen, lesen vnde vmme de grauer ghan.
De anderen eten de guden morseel
Vnde krygen wech dat beste vordeel.
4065
¶ Wat spricktmen van des paweses legaten,
Van abbeten, prouesten efte anderen prelaten,
Beghynen, nonnen, ya we se ok syn?
Id is al: geuet mi dat iuwe, latet my dat myn.
Men vyndet manckt teynen nauwe seuen,
4070
De recht in ereme orden leuen:
So swack is nu de gheystlyke stad."
¶ Do sprack de greuynck: „oem, dyt is quad,
Dat gy sus der anderen sunde
Vor my bychten in desser stunde.
4075
Des bychtent helpet nicht eynen dreck,
De nicht enbychtet syn eghene ghebreck.
Wat vrage gy na der gheystlicheyt,
Wat de eyne efte de ander deyt?
Islyck moet dragen syne egene borden
4080
Vnde rede gheuen vor synen orden,
Wo eyn yslyck den heft gheholden,
Id sy manckt den yungen efte manckt den olden.
Dar wyl ick nemande buten sluten,
Id sy in klösteren efte dar buten.
4085
Doch, Reynke, gy spreken van velen dyngen,
Gy scholden my draden in erredom bryngen.
Gy wetten encket der werlde staet
Vp dat nauweste, wo alle dynck ghaet.
Van rechte scholde gy syn eyn pape
4090
Vnde laten my vnde andere schape
To yw bychten vnde van yw leren,
Dar myt wy mochten tor wyßheyt keren.
Wy synt eyn deel stump vnde groff."
Hir mede quemen se vor des konnynges hoff.
4095
Do wart Reynke halff vortzaget,
Doch sprack he do: „yd is ghewaget!"
¶ Wo Marten de ape reysede na Rome vnde Reynken motte vnde syne sake myt syk nam, vnde van etlyken to Rome. Dat IX. capittel.
Marten de ape dyt hadde vornomen,
Dat Reynke wolde to houe komen.
He wolde reysen den wech na Roem.
4100
Do he eme motte, he sprak: „leue om,
Hebbet vry eynen guden mod!"
He wuste wol, wo syne sake stod,
Doch vragede he na eyneme stucke.
¶ Do sprack Reynke: „my is dat ghelucke
4105
In dessen dagen seer entyegen.
Ick byn echt vorklaget todegen
Van etlyken deuen, we se ock syn,
Van der kreyen vnde deme orlozen kannyn.
De eyne heft syn wyff vorloren,
4110
De ander de helfte van synen oren.
Mochte ick suluen vor den konnynck komen,
Dat scholde en beyden weynich vromen.
Dat meyste, my wert schaden dar an,
Is, ick byn in des pawes ban.
4115
De prouest heft der sake macht,
De by deme konnynge is in groter acht.
Dar vmme ik in deme banne byn,
Is, dat ick Ysegryme gaff den syn,
Do he monnyk was gheworden,
4120
Dat he wech leep vth deme orden,
Do he tor Elemar was begheuen,
He swor, he konde alzo nicht leuen
In alzo hardem strengen wesen,
So lange to vasten, so vele to lesen.
4125
Ick halp eme wech, dat ruwet my sere;
Dar vor deyt he my wedder vnere
Jegen den konnynck to voren an
Vnde deyt my quad, al wor he kan.
Schal ik to Rome, dat wyl seer hynderen
4130
Mynem wyue vnde mynen kynderen,
Wente Ysegrym de leth des nicht,
He deyt ene quad, wor he se krycht,
Myt anderen, de my syn seer quad
Vnde soeken vp my seer bözen rad.
4135
Were ick vth deme banne ghelost,
So hadde ick sus wol beteren trost
Vnde mochte vprychtich myt ghemake
Spreken vor myne eghene sake."
¶ Marten sprack: „Reynke, leue oem,
4140
Ick wyl recht nu vp na Roem.
Ik wyl yw helpen myt schonen stucken
Vnde wyl yw nicht laten vordrucken.
Byn ick doch des bysschoppes klerck!
Ja, gantz wol vorsta ick my vp dat werck:
4145
Ick wyl den prouest to Rome citeren
Vnde wyl tegen en alzo pliteren,
Seet, oem, vnde doen yw execucien
Vnde bryngen yw eyne absolucien
Synes vndanckes, were yd eme ock leet.
4150
Wente ick to Rome den loep wol weet,
Wat ik schal laten efte doen.
Dar is ock myn oem Symon,
De mechtich is vnde seer vorheuen;
He helpet deme gherne, de wat mach gheuen.
4155
Her Schalkevunt is dar ock eyn here,
Ock doctor Grypto vnde der noch mere,
Her Wendehoyke myt her Lozevunde,
Dyt synt alle dar vnse vrunde.
Ik hebbe gelt vorhen ghesant,
4160
Hir mede werde ick best bekant.
Ja, schyth, men secht vuste van citeren
Dat gelt ysset al, dat se begheren.
Al were de sake noch so krum,
Myt ghelde wyl ick se kopen vm.
4165
De gelt brynget, krycht to hantes gnade,
De dat nicht heft, de kumpt to spade.
¶ Seet, oem, dar vmme gy syd in deme ban,
Alle de sake the ick my an.
Ik neme de vp my vnde gheue se yw quyd.
4170
Ghaet vry to houe, vnde so gy dar syd
Dar is myn wyff, vrouwe Rukenauwe;
Wente de konnynck, vnse here, de lauwe,
Heft se leeff vnde ock de konnygynne,
Wente se seer behende is van synne.
4175
Spreket se an, se is seer vroet,
Wente se gherne dorch vrunde wes doet.
Gy vynden an er vruntschop groet,
Dat recht heft vaken hulpe noet.
Dar synt by er ere sustere twey
4180
Vnde ock dar to myne kyndere drey,
Noch vele dar to van yuweme slecht,
De yw wol bystan in deme recht.
Mach yw dan sus neen recht bescheen,
So schole gy dat in kort ok seen.
4185
Doet my dat yo draden to weten:
Alle de int lant syn beseten,
Isset konnynck, vrouwe, kynt efte man,
Alle wyl ick se bryngen in den ban
Vnde senden en interdict so swar,
4190
Men schal dar wer hemelyck efte openbar
Syngen, grauen, döpen, wat yd ock sy.
Neue, hir vp so trostet vry.
¶ De pawes is eyn old kranck man,
He nympt syck nenes dynges meer an,
4195
Alze datmen syner nicht vele acht.
Men alto male des houes macht
Heft de cardinal van Vnghenöghe,
Eyn man yunck, mechtich, van behendem töge.
Ick kenne eyne vrouwen, de heft he leeff,
4200
De schal eme bryngen eynen breff;
Myt der byn ick seer wol bekant,
Ja, wat se wyl, dat blyft neen tant.
Syn schryuer heth Yohannes Partye,
He kennet wol olde münte vnde nye.
4205
Horkenauweto is syn kumpan,
De is des houes kurtesan.
Slypenvndewenden is notarius,
In beyden rechten eyn bacalarius;
Wo desse noch eyn yar dar blyft,
4210
He wert mester in practiken schrift.
Moneta vnde Donarius
Synt twey richter int sulue hus:
Wem desse twey affseggen dat recht,
Deme blyftet ock wol alzo ghesecht.
4215
Alsus is dar mannyghe lyst,
Dar an de pawes vnschuldich ist.
De moet ik alle holden to vrunde,
Dorch se vorghyftmen nu de sunde
Vnde löset dat volck vth deme ban.
4220
Seet, Reynke oem, hir holdet yw an.
De konnynck heft yd rede ghehord,
Dat ick yuwe sake vore vort;
He wed, dat ick dat wol kan weruen,
Men mach yw nicht laten vorderuen.
4225
Dyt wyl de konnynck bedencken recht,
Dat vele synt apen vnde vosses slecht,
De vaken eme gheuen den nauwesten rad.
Dyt wert yw helpen, wo yd ock ghad."
¶ Reynke sprack: „dat is gud trost,
4230
Ick dencke des wedder, werde ick vorlost."
Hir myt eyn van deme anderen scheyde.
Reynke ghynck vord ane gheleyde
Myt Grymbarde in des konnynges hoff,
Dar in he hadde seer klenen loff.
