Munk og Ågerkarl

Ha maistre: par la passeres
Naiez ia soing de vous deffendre
Plus hommes nespoventeres.
    Apres moinne sans plus actendre
Ou pensez vous: cy fault entendre
Tantost aurez la bouche close.
Homme nest: fors que vent et cendre
Vie domme est moult peu de chose

       Le moinne

Iamasse mieulx encore estre
En cloistre et faire mon service
Cest ung lieu devost et bel estre
Or ay ie comme fol. et nice.
Ou temps passe commis maint vice
De quoy nay pas fait penitance
Souffisant. dieu me soit propice
Chascun nest pas ioyeux qui danse

Usurier. de sens desrugles
Venez tost: et me regardez.
Dusure estes tant aveugles:
Que dargent gaingner tout ardez
Mais vous en seres bien lardez
Car se dieu qui est merveilleux
Na pitie de vous: tout perdez
A tout perdre est cop perilleux.

       Lusurier

Me convient il si tost morir:
Ce mest grant peinne et grevance
Et ne me pourroit secourir
Mon or mon argent ma chevance
Ie vois morir la mort mavance
Mais il men desplait somme toute
Quest ce de male acoustumance
Tel a beaux yeux qui ne voit goute

       Le povre homme

Usure est tant maulvaiz pechie
Comme chascun dit: et raconte.
Et cest homme: qui approchie
Se sent de la mort: nen tient conte.
Mesme largent: quen ma main compte
Encore a usure me preste.
Il devra de retour au compte.
Nest pas quitte qui doit de reste.