Biskop og Adelsmand

Tantost naurez vaillant ce pic
Des biens du monde. et de nature.
Evesque: de vous il est pic
Non ostant vostre prelature.
Vostre fait git en aventure.
De vos subges fault rendre compte:
A chascun dieu fera droicture.
Nest pas asseur qui trop hault monte.

       Levesque

Le cueur ne me peult esioir
Des nouvelles que mort maporte
Dieu vouldra de tout compte oir:
Cest ce que plus me desconforte:
Le monde aussi: peu me conforte
Qui tous a la fin desherite.
Il retient tout: nul rien nemporte
Tout ce passe fors le merite.

Avance vous gent escuier
Qui saves de danser les tours.
Lance pourties: et escu hier:
Et huy vous fineres vos iours.
Il nest rien qui ne praigne cours.
Dansez: et panser de suir.
Vous ne poves avoir secours.
Il nest: qui mort puisse fuir.

       Lescuier

Puis que mort me tient en ses las
Aumoins que ie puisse un mot dire.
A dieu deduis: a dieu solas:
A dieu dames plus ne puis rire.
Pensez de lame: qui desire
Repos. ne vous chaille plus tant
Du corps: que tous lesiours empire
Tous fault morir on ne scet quant.