La danse Macabre, 1485, Teksten

Dette er den tekst, som Guy Marchant udgav år 1485. I det eneste eksisterende eksemplar mangler (næsten hele) bladet med autoriteten, paven og kejseren, så teksten starter med kardinalen.

Forkortelser er opløst. Det eneste kontroversielle er connétablens syvende linie, hvor bogstavet e med streg over normalt ville læses som "en", men her snarere bør være "est": »Tout luy est vng« (i barnets sjette linie bør det derimod være "en": »Prendre en gre«).

Omvendte u'er og n'er er stiltiende vendt den rigtige vej med undtagelse af den sidste linie af Døden til købmanden, hvor det kan være svært at blive klog på, om der skal stå "couuoite" eller "conuoite".

Døden til kardinalen

   Le mort
Vous faictez lesbay se semble
Cardinal: sus legierement:
Suiuons les autres tous ensemble:
Rien ny vault esbaissement.
Vous auez vescu haultement.
Et en honneur a grant deuis:
Prenez en gre lesbatement.
En grant honneur se pert laduis

Kardinalen

   Le cardinal
Iay bien cause de mesbair
Quant ie me voy de cy pres pris.
La mort mest venuee assallir:
Plus ne vestiray vert ne gris.
Chapeau rouge chappe de pris
Me fault laisser a grant destresse:
Ie ne lauoye pas apris.
Toute ioye fine en tristesse.

Døden til kongen

   Le mort
Venes noble roy couronne
Renomme de force et de proesse:
Iadis fustez enuironne
De grant pompez: de grant noblesse
Mais maintenant toute haultesse
Laisseres: vous nestes pas seul.
Peu aures de vostre richesse.
Le plus riche na qun linceul.

Kongen

   Le roy
Ie nay point apris a danser
A danse et note si sauuage
Las: on peut veoir et penser
Que vault orgueil force lignage.
Mort destruit tout: cest son vsage:
Aussi tost le grant que le maindre.
Qui moing se prise plus est sage.
En la fin fault deuenir cendre:

Døden til patriarken

   Le mort
Patriarche pour basse chiere
Vous ne pouez estre quitte
Vostre double croix quaues chiere
Vng autre aura: cest equite.
Ne pensez plus a dignite.
Ia ne seres pape de romme
Pour rendre compte estes cite
Fole esperance decoit lome

Patriarken

   Le patriarche
Bien apercoy que mondain honneur
Ma deceu: pour dire le voir
Mes ioyes tornent en doleur.
Et que vault tant donneur auoir.
Trop hault monter nest pas sauoir
Haulx estas gastent gens sans nombre
Mais peu le veulent parceuoir.
A hault monter le fais encombre

Døden til connétablen

   Le mort
Cest de mon droit que ie vous mainne
A la danse gent connestable:
Les plus fors comme charlemaigne
Mort prent cest chose veritable:
Rien ne vault chere espouentable
Ne forte armeure en cest assault
Dun cop iabatz le plus estable.
Rien nest darmes quant mort assault

Connétablen

   Le connestable
Iauoye encor entencion
Dassaillir chasteaulx forteresses.
Et mener a sugection
En aquerant honneurs richesses.
Mais ie voy que toutes proesses
Mort met au bas: cest grant despit
Tout luy est vng: doulceurs rudesses
Contre la mort na nul respit.

Døden til ærkebiskoppen

   Le mort
Que vous tires la teste arriere
Archeuesque: tirez vous pres.
Auez vous peur quon ne vous fiere
Ne doubtez: vous venres apres.
Nest pas tousiours la mort empres
Tout homme: et le suit coste a coste.
Rendre conuient debtes et prest.
Vne foys fault compter a loste.

Ærkebiskoppen

   Larcheuesque
Las: ie ne scay ou regarder
Tant suis par mort a grant destroit
Ou fuiray ie pour moy aider.
Certes qui bien la congnoistroit
Hors de raison iamais nistroit.
Plus ne gerray en chambre painte.
Morir me conuient cest le droit.
Quant faire fault cest grant contrainte.

Døden til ridderen

   Le mort
Vous qui entre les grans barons
Aues eu renon cheuallier:
Obliez trompettes clarons
Et me suiuez sans sommellier.
Les dames solies reueillier
En faisant danser longue piece.
A autre danse fault veillier.
Ce que lun fait lautre despiece.

Ridderen

   Le cheualier
Or ay ie este auctorise
En pluseurs fais: et bien fame.
Des grans et des petis prise:
Auec ce des dames ame.
Ne oncques ne fus diffame
A la court de seigneur notable:
Mais a ce cop suis tout pasme.
Dessoubz le ciel na rien estable.

Døden til biskoppen

   Le mort
Tantost naures vaillant ce pic
Des biens du monde et de nature
Euesque: de vous il est pic
Non ostant vostre prelature.
Vostre fait giet en auenture.
De vous subges fault rendre compte:
A chascun dieu fera droiture.
Nest pas asseur qui trop hault monte

Biskoppen

   Leuesque
Le ceur ne me peul esioir
Des nouuelles que mort maporte.
Dieu vouldra de tout compte oir:
Cest ce que plus me desconforte.
Le monde ausi: peu me conforte:
Qui tous a la fin desherite.
Il retient tout: nul rien nemporte.
Tout ce passe fors le merite.

Døden til adelsmanden

   Le mort
Auancez vous gent escuier
Qui saues de danser les tours.
Lance porties: et escu hier:
Et huy vous fineres vos iours
Il nest rien qui ne praigne cours.
Dansez: et pansez de suir.
Vous ne pouez auoir secours.
Il nest qui mort puisse fuir.

Adelsmanden

   Lescuier
Puis que mort me tient en ses las
Aumoins que ie puisse vng mot dire
Adieu deduis: adieu solas:
Adieu dames: plus ne puis rire.
Pensez de lame qui desire
Repos. ne vous chaille plus tant
Du corps: que tous lesiours empire.
Tous fault morir on ne scet quant

Døden til abbeden

   Le mort
Abbe: venez tost: vous fuyez:
Nayez ia la chiere esbaye
Il conuient que la mort suyez.
Combien que moult lauez haye.
Commandez adieu labbaye:
Que gros et gras vous a nourry.
Tost pourrirez a peu de aye.
Le plus gras est premier pourry.

Abbeden

   Labbe
De cecy neusse point enuie:
Mais il conuient le pas passer.
Las: or nay ie pas en ma vie
Garde mon ordre sans casser.
Garde vous de trop embrasser
Vous qui viuez au demorant
Se vous voulez bien trespasser.
On sauise tart en mourant.

Døden til fogeden

   Le mort
Bailly qui sauez quest iustice:
Et hault et bas: en mainte guise
Pour gouuerner toute police.
Venez tantost a ceste assise.
Ie vous adiourne de main mise
Pour rendre compte de vos fais
Au grant iuge: qui tout vng prise.
Vn chascun portera son fais.

Fogeden

   Le bailly
Hee dieu: vecy dure iournee:
De ce cop pas ne me gardoye.
Or est la chance bien tournee:
Entre iuges honneur auoye.
Et mort fait raualer ma ioye:
Qui ma adiourne sans rappel.
Ie ny voy plus ne tour ne voye.
Contre la mort na point dappel.

Døden til astrologen

   Le mort
Maistre: pour vostre regarder
En hault: ne pour vostre clergie:
Ne pouez la mort retarder.
Cy ne vault rien astrologie.
Toute la genealogie
Dadam qui fut le premier homme
Mort prent: ce dit theologie.
Tous fault morir pour vne pomme.

Astrologen

   Le maistre
Pour science: ne pour degrez:
Ne puis auoir prouision
Car maintenant tous mes regrez
Sont: morir a confusion.
Pour finable conclusion
Ie ne scay rien que plus descriue.
Ie pers cy toute aduision.
Qui vouldra bien morir: bien viue

Døden til borgeren

   Le mort
Bourgois: hastez vous sans tarder.
Vous nauez auoir ne richesse
Qui vous puisse de mort garder.
Se des biens dont eustes largesse
Aues bien vse: cest sagesse.
Dautruy vient tout a autruy passe
Fol est qui damaser se blesse.
On ne scet pour qui on amasse.

Borgeren

   Le bourgois
Grant mal me fait: si tost laissier
Rentes: maisons: cens: norritures
Mais poures: riches: abaissier
Tu faiz mort: telle est ta nature.
Sage nest pas la creature
Damer trop les biens qui demeurent
Au monde: et sont siens de droiture.
Ceulx qui plus ont: plus enuiz meurent.

Døden til kannikken

   Le mort
Sire chanoine prebendez:
Plus ne aures distribucion:
Ne gros: ne vous y attandez:
Prenez cy consolacion.
Pour toute retribucion
Morir vous conuient sans demeure
Ia ny aurez dilacion.
La mort vient quon ne garde leure.

Kannikken

   Le chanoine
Cecy gueres ne me conforte:
Prebendez fus en mainte eglise.
Or est la mort plus que moy forte:
Qui tout emmainne cest sa guise.
Blanc seurplis et amusse grise
Me faut laissier: et a mort rendre.
Que vault gloire sy tout bas mise.
A bien mourir doit chascun tendre.

Døden til købmanden

   Le mort
Marchant: regerdez par deca:
Pluseurs pais aues cerchie
A pie: a cheual: de pieca:
Vous nen seres plus empeschie.
Vecy vostre dernier merchie.
Il conuient que par cy passez.
De tout soing seres despechie.
Tel couuoite qui a assez.

Købmanden

   Le marchant
Iay este amont et aual:
Pour marchander ou ie pouoye.
Par long temps apie: acheual:
Mais maintenant pers toute ioye.
De tout mon pouoir acqueroye:
Or ay ie assez mort me contraint.
Bon fait aler moyenne voye.
Qui trop embrasse peu estraint.

Døden til karteuser

   Le mort
Alez marchant sans plus rester:
Ne faites ia cy resistence.
Vous ny poues rien conquester.
   Vous aussi: homme dastinence
Chartreux: prenez en pacience.
De plus viure nayes memoire.
Faites vous valoir a la dance.
Sur tout homme mort a victoire

Karteuseren

   Le chartreux
Ie suis au monde pieca mort:
Par quoy de viure ay moins enuie
Ia soit que tout homme craint mort.
Puis que la char est assouuie:
Plaise a dieu que lame rauie
Soit es cielx apres mon trespas.
Cest tout neant de ceste vie.
Tel est huy: qui demain nest pas.

Døden til sergenten

   Le mort
Sergent qui portez celle mace:
Il semble que vous rebellez.
Pour neant faittez la grimace:
Se on vous greue si appellez.
Vous estez de mort appellez.
Qui luy rebelle il se decoit.
Les plus fors sont tost rauallez.
Il nest fort quausi fort ne soit.

Sergenten

   Le sergent
Moy qui suis royal officier:
Comme mose la mort frapper.
Ie fasoie mon office hier:
Et elle me vient huy happer.
Ie ne scay quel part eschapper:
Ie suis pris: deca et dela.
Malgre moy me laisse apper.
Enuiz meurt qui apris ne la.

Døden til munken

   Le mort
Ha: maistre: par la passeres
Nayez ia soing de vous deffendre
Plus hommes nespouenteres.
   Aprez moinne sans plus actendre
Ou pensez vous: cy fault entendre
Tantost aurez la bouche close
Homme nest: fors que vent et cendre
Vie domme est moult peu de chose.

Munken

   Le moinne
Iamasse mieux encore estre
En cloistre et faire mon seruice
Cest vng lieu deuost et bel estre
Or ay ie comme fol et nice
Ou temps passe commis maint vice
De quoy nay pas fait penitance
Souffisant. dieu me soit propice
Chascun nest pas ioyeux qui danse.

Døden til ågerkarlen

   Le mort
Vsurier. de sens desreugle
Venez tost: et me regardez.
Dusure estes tant aueugle:
Que dargent gaingner tout ardez.
Mais vous en seres bien lardez
Car se dieu qui est merueilleux.
Na pitie de vous: tout perdez
A tout perdre: est cop perilleux.

Ågerkarlen

   Lusurier
Me conuient il si tost morir:
Ce mest grant paine & grant greuance
Et ne me pourroit secourir.
Mon or: mon argent: ma cheuance
Ie voys morir: la mort mauance
Mais il men desplait somme toute
Quest ce de male acoustumance:
Tel a beaux yeux qui ne voit goute

Den fattige mand

         Le poure homme
Vsure est tant maluaiz pechie
Comme chascun dit: et raconte.
Et cest homme: qui approuchie
Se sent de la mort: nen tient conte.
Mesme largent: quen ma main compte
Encore a vsure me preste.
Il deura de retour au compte.
Nest pas quitte: qui doit de reste.

Døden til lægen

   Le mort
Medecin a tout vostre orinne
Voies vous icy quamander:
Iadis sceustes de medecinne
Asses pour pouoir commander.
Or vous vient la mort demander.
Comme autre vous conuient morir:
Vous ny poues contremander.
Bon mire est qui se scet guerir.

Lægen

   Le medecin
Long temps a quen lart de phisique
Iay mis toute mon estudie.
Iauoye science: et pratique.
Pour guerir maintes maladie.
Ie ne scay que ie contredie
Plus ny vault herbe ne racine:
Nautre remede quoy quon die.
Contre la mort na medicine.

Døden til frieren

   Le mort
Gentil amoreux gent et frique
Qui vous cuidiez de grant valeur:
Vous estes pris la mort vous pique.
Le monde lares a douleur.
Trop lauez ame: cest foleur:
Et a morir peu regarder.
Ia tost vous changeres coleur.
Beaute nest quymage farder.

Frieren

   Lamoreux
Helas: or ny a il secours
Contre mort adieu amourettes:
Moult tost va ieunesse a decours.
A dieu chapeaux bouques fleuretes
A dieu amans: et puceletes:
Souienne vous de moy souuent.
Et vous mirez se sages estes:
Petite pluie abat grant vent.

Døden til advokaten

   Le mort
Aduocat sans long proces faire
Venez vostre cause plaidier.
Bien auez sceu les gens attraire
De pieca: non pas duy ne dier.
Conseil: cy ne vous peult aidier.
Au grant iuge vous fault uenir:
Sauoir le deues sans cuidier.
Bon fait iustice preuenir.

Advokaten

   Laduocat
Cest bien droit que raison se face
Ne ie ny scay mectre deffence:
Contre mort na respit ne grace:
Nul napelle de sa sentance.
Iay eu de lautruy quant ie y pence
De quoy ie doulte estre repris.
A craindre est le iour de vengence.
Dieu rendra tout a iuste pris.

Døden til troubadouren

   Le mort
Menestrel qui danses et notes
Sauez: et auez beau maintien
Pour faire esiouir sos et sotes:
Quen dictez vous allons nous bien
Monstrer vous fault puis que vous tien
Aux autres cy: vng tour de danse
Le contredire ny vault rien.
Maistre doit monstrer sa science

Troubadouren

   Le menestrel
De danser ainsy neusse cure
Certes tresenuiz ie men mesle:
Car de mort nest painne plus dure
Iay mis soubz le banc ma vielle.
Plus ne corneray sauterelle
Nautre danse: mort men retient
Il me fault obeir a elle.
Tel danse a qui au ceur nen tient

Døden til sognepræsten

   Le mort
Passes cure sans plus songier:
Ie sens questez abandonne.
Le vifz le mort solies mengier:
Mais vous seres aux vers donne.
Vous fustez iadis ordonne
Miroer dautruy: et exemplaire.
De vous fais seres guerdonne.
A toute painne est deu salaire.

Sognepræsten

   Le cure
Veille ou non il fault que me rende
Il nest homme que mort nassaille.
Hee: de mes parrossiens offrende
Nauray iamais: ne funeraille.
Deuant le iuge fault que ie aille.
Rendre compte: las doloreux:
Or ay ie grant peur que ne faille.
Qui dieu quitte bien est eureux.

Døden til bonden

   Le mort
Laboreur qui en soing et painne
Auez vescu tout vostre temps:
Morir fault cest chose certainne
Reculler ny vault: ne contens.
De mort deues estre contens.
Car de grant soussy vous deliure.
Approuchiez vous ie voz attens
Folz est qui cuide tousiour viure.

Bonden / arbejderen

   Le laboureur
La mort ay souhaite souuent
Mais volentier ie la fuisse:
Iamasse mielx fist pluye ou vent
Estre es vignes ou ie fouisse:
Encor plus grant plaisir y prisse
Car ie pers de peur tout propos.
Or nest il qui de ce pas ysse.
Au monde na point de repos.

Døden til franciskaneren

   Le mort
Faictes voye: vous aues tort
Laboureur. Apres cordelier
Souuent aues preschie de mort:
Si vous deues moins merueillier
Ia ne sen fault esmay baillier.
Il nest si fort que mort nareste.
Si fait bon a morir veillier.
A toute heure la mort est preste

Franciskanermunken

   Le cordelier
Quest ce: que de viure en ce monde
Nul homme a seurte ny demeure
Toute vanite y habonde
Puis vient la mort qua tous court sure
Mendicite point ne massure:
Des meffais fault paier lamende
En petite heure dieu labeure.
Sage est le pecheur qui samende

Døden til barnet

   Le mort
Petit enfant na gueres ne:
Au monde auras peu de plaisance
A la danse seras mene
Comme autres. car mort a puissance
Seur tous: du iour de la naissance
Conuient chascun a mort offrir:
Fol est qui nen a congnoissance.
Qui plus vit plus a a souffrir

Barnet

   Lenfant
A. a. a. ie ne scay parler
Enfant suis: iay la langue mue.
Hier nasquis huy men fault aler
Ie ne faiz quentree et yssue
Rien nay meffait. mais de peur sue
Prendre en gre me fault cest le mieulx
Lordonnance dieu ne se mue.
Aussi tost meurt ieusne que vieux

Døden til degnen

   Le mort
Cuidez voz de mort eschapper
Clerc esperdu pour reculer:
Il ne sen fault ia defripper.
Tel cuide souuent hault aler
Quon voit acop tost raualler.
Prenez en gre: alons ensemble
Car rien ny vault le rebeller.
Dieu punit tout quant bon luy semble

Degnen

   Le clerc
Fault il qun ieusne clerc seruant
Qui en seruice prent plesir
Pour cuider venir en auant
Meure si tost: cest desplaisir.
Ie suis quitte de plus choisir
Autre estat. il fault quansi danse.
La mort ma pris a son loisir.
Moult remaint de ce que fol pense

Døden til eremitten

   Le mort
Clerc: point ne fault faire refus
De danser: faicte vous valoir.
Vous nestes pas seul: leues sus:
Pour tant moins voz endoit chaloir
   Venes apres cest mon voloir
Homme nourry en hermitage:
Ia ne vous en conuient douloir.
Vie nest pas seur heritage.

Eremitten

   Le hermite
Pour vie dure ou solitaire
Mort ne donne de viure espace.
Chascun le voit: si sen fault taire
Or requier dieu qun don me face
Cest que tous mes pechies efface
Bien suis contens de tous ses biens
Desquelx iay vse de sa grace.
Qui na souffisance il na riens

Døden

   Le mort
Cest bien dit: ainsi doit on dire.
Il nest qui soit de mort deliure.
Qui mal vit il aura du pire:
Si pense chascun de bien viure.
Dieu pesera tout a la liure
Bon y fait penser soir et main:
Meilleur science na en liure.
Il nest qui ait point de demain

Den døde konge

   Vng roy mort
Vous: qui en ceste pourtraiture
Veez danser estas diuers.
Pensez quest humainne nature:
Ce nest fors que viande a vers.
Ie le monstre: qui gis enuers:
Si ay ie este roy coronnez.
Telz seres vous: bons: et peruers.
Tous estas: sont aux vers donnes.

Autoriteten

   Lacteur
Rien nest domme: qui bien y pense.
Cest tout vent: chose trasitoire.
Chascun le voit: par ceste danse.
Pour ce: vous qui veez listoire
Retenez la bien en memoire.
Car hommes et femmes elle amoneste:
Dauoir de paradis la gloire.
Eureux est: qui es cielx fait feste.

Mais aucuns sont a qui nenchault
Comme sil ne fust paradis:
Ne enfer. helas: il auront chault.
Les liures que firent iadis
Les sains: le monstrent en beaux dis.
Acquitez vous qui cy passes:
Et faictez des biens: plus nen dis.
Bien fait vault moult es trespasses

Yderligere oplysninger


Op til 1485-udgaven