|
|
Her er teksten fra manuskriptet Ms. Germ. Fol. 19 (illustrationerne er fra Xyl. 39).
Jeg har gjort det første bogstav i hver linie stort, og to gange har jeg skrevet et ord med stort, fordi det er markeret med rødt i manuskriptet. Ordet [Ich] er tilføjet til paven, fordi det ellers ikke giver mening.
De to linier, der burde have nummer 13 og 14 er erstattet af en enkelt linie, der ikke rimer med noget (»[…] pin on end«). Derfor fylder den indledende prædikenen kun 25 linier i stedet for 26. Jeg lader dog stadig pavens dialog starte med line 27.
.Der toten tantz
|
O diser welt wisheit kind
All die noch in leben sind
Setzent in wuer hertz zway wort
Die von cristo sind gehort
5
Das ein gond her Das ander gond hin
Durch das erst die fromen hand gewin
In des himels fröiden do si kůmen hin
Das ander noch den worten
Die bösen wist ab zů der helschen porten
10
Also so wirt in disen worten
Geben ein sölicher vnderscheid
Das ein wort ist gantz in fröid bereit
Das ander wort leid vnd pin on end
Dar vmb ich uch getrwlich rot
15
Tůnd uch ab wpiger tat
Wan die zit ist kurtz in disem leben
Dar nach wirt ach vnd we gegeben
Durch den zwichfachen tod
Wber die bösen mieman kein erbermd hat
20
Der helschen pfiffen schriÿen
Die bringet vns all an einen reÿen
Dar an die wisen als die narren
Gezwungen in disen sprüngen müsen varen
Als dises tantzes viguren
25
Sind ein ebenbild ze allem truren
|
der dott
Her babst nu merckent vf der pfiffen ton
Ir sond dar noch springen schon
Es hilft dar für kein tispatieren
30
Der tod wil uch an den tantz füren
babst
Ich was ein helger babst genant
Die wil [ich] lebt on vorcht bekant
Nu wird ich gefüret frefellich
Zů dem tod ich wer mich wppiklich
|
der dot
35
Her keiser üch hilfet nit das schwert
Zepter vnd kron sind hie vnwert
Ich han uch an die hand genomen
Ir müsent an minen reÿen komen
keiser
Ich kond das rich in hochen eren
40
Mit strit vnd vechten wol geweren
Nu hat der tod wberwunden mich
Das ich bin weder keiser noch einem menschen glich
|
der dott
Ich tantz üch vor frow keiserin
Springent mir noch der rey ist min
45
Die sperbrecher sind von uch gewichen
Der tod hat uch allein erschlichen
keiserin
Wollust het min stolzer lib
Do ich lebt als eines keisers wib
Nu hat mich der tod ze schanden brocht
50
Das mir kein fröid ist me erdocht
|
der tot
Her küng wüer gewalt hat ein end
Ich wil üch füren bi der hend
An disen schwartzen brůder tantz
Do git uch der tod einen krantz
kuing
55
Ich han als ein küng gewaltiklich
Die welt gere<g>ieret das römisch rich
Nu bin ich mit des todes banden
Ser verstricket in sinen handen
|
der dot
Springent vf mit wuerem roten hůt
60
Her kardinal der tantz ist gůt
Ir hand gesegnet wol die leyen
Ir müssent nu mit den toten reÿen
kardinal
Ich was mit bebstlicher wal
Der helgen kirchen kardinal
65
Nu bin ich dar zů gezwungen gar
Das ich tantzen můs an des todes schar
|
der tot
Her patriarch Nu lond uch lingen
Ir müsent mit mir den reigen springen
Das zwifach krutz das lond fallen
70
Der tod der wil mit uch ietz schallen
pateriarch
Ich han das zwifach krutz getragen
Als ein patriarch bi minen tagen
Nu wil mich der tod des bezwingen
Mit sinen gesellen ze springen
|
der dot
75
Sind ir in hocher wirde gesessen
Her ertzbischof daz ist gar vergessen
Uch kan gehelfen weder krutz noch pfaffen
Ir müssent ouch tantzen mit disen affen
ertzbischof
Ich trůg in hocher wirdikeit
80
Das crutz vor aller pfafheit
Als ein ertzbischof das tragen sol
Nu so gang ich an der toten zol
|
der tod
Hand ir ie mit frowen hoch gesprungen
Stoltzer herzog oder wol gesungen
85
Das müsend ir an disem reigen büssen
Wol her wie lust uch hie diser toten grüssen
herzog
Ich han die edlen herren werd
Als als ein hertzog gereigieret mit dem schwert
Nu bin ich in vechen kleidren gantz
90
Gezwungen an des todes tantz
|
der tot
Wüer wird vnd er hand sich verkert
Her bischof wis vnd wol gelert
Ich wil uch an den reigen ziechen
Do ir dem tod nit mugent entpfliechen
bischof
95
Ich bin wirdigklichen geeret worden
Die wil ich lebt in bischofs orden
Nu ziechen mich die vngeschaffen
Zů dem tod als einen affen
|
der tod
Her graf heisen uch den keiser helfen
100
Ich bring uch hüt zů wilden welfen
Mit denen ir müsen tantzen jagen
Der tod wil uch des nit vertragen
grof
Ich was in der welt genant
ein edler grof dem rich bekant
105
Nu bin ich von dem tod gefelt
Vnd Vnd hie in sinen tantz gezelt
|
Der tod
Nu tantz mir noch her gugel wit
Wie wol ir nu ein abt sit
Ir müssent des todes regel halten
110
Der wil würs libes walten
abt
Ich han vil münch als ein abt gelert
Streng gezogen vnd wol gewert
Nu wird ich selber hie bezwungen
Vnd mit des todes regel getrungen
|
tot
115
Her riter ir sind an geschriben
Wan ir nu die riterschaft müsent triben
Mit dem tod vnd sinen knechten
Vch hilft weder schinpf noch fechten
riter
Ich han als ein strenger riter gůt
120
Der welt gedient in hochem můt
Nu bin ich wider riters orden
An disen tantz gezwungen worden
|
der tod
Die vrteil ist also gegeben
Das ir nit lenger sölent leben
125
Her jurist das důt des todes kraft
Mugent ir so bewisen wür meisterschaft
jurist
Es hilft kein apolieren nuit
Fur des dodes letzsten strit
Er wberwint mit sinem geschlecht
130
Das geistlich vnd das weltlich recht
|
der tot
Her korpfaf hand ir gesungen for
Süs gesang in wüerem kor
So merckent vf der pfiffen schal
Die verkündet uch des todes fal
tůmher
135
Ich han als ein korher fry
Gesungen meng lieplich melody
Des todes pfif stot dem nit gelich
Si hat so ser erschrecket mich
|
der tot
Her artzat tůnd uch selber rat
140
Mit wüer meisterlichen tat
Ich für uch zů des todes gesellen
Die mit uch all tantzen wellen
arzatt
Ich han mit minem harn schowen
Gesund gemacht man vnd frowen
145
Wer wil nu machen mich gesunt
Wan ich bin zů dem tod wund
|
der tod
Nu kument her ir edler tegen
Ir müssent ietz der stercke pflegen
Mit dem tod der niemand schont
150
Vnd ligent ir im ob uch wirt gelont
edelman
Ich han mengen man erschreckt
Der wol mit harnesch was bedeckt
Nu hat bezwungen mich der tod
Vnd bringt mich in die jungsten not
|
<d>e<r> dot
155
Edle frow nu tantzent noch würem synn
Bis das die pfif rechten ton gewin
Si hat der frowen vor vil betrogen
Die all der tod hat hin gezogen
edelfrow
Ich solt hie triben juchsens vil
160
Sech ich vor mir der fröiden spil
Des todes pfifen mich also betringt
Sin tantz vnd gesang hie valschlich klingt
|
der tod
Her koufman was hilft wüer gewerben
Die zit ist hie das ir müssen sterben
165
Der tod nimt weder miet noch goben
Dantz mir noch ich wil dich haben
koufman
Ich hat mich ze leben versorget wol
Das kisten vnd kasten waren fol
Nu hat der tod min gab verschmacht
170
Vnd hat mich vmb lib vnd gůt gebracht
|
tot
Frow nunn ir tunckent uch selb subtil
Dester gerner ich mit uch tantzen wil
Werfent von uch den schapelern
Ir müsent mit mir vnd den toten fern
kloster nun
175
Ich han in dem kloster Min
Got gedienet als ein gewichtes nünlin
Was hilft mich nu min betden
Ich můs des todes reygen treten
|
tot
Nu hinck her mit diner krucken
180
Din ding das wil sich dir gelucken
Dich hand die lebenden nit fur gůt
Der tod dir sunder gnade tůt
krupel
Ein armer giler hie in leben
Zů einem frund ist nieman eben
185
Aber der tod wil sin fründ sin
Er nimt in mit den richen hin
|
tod
Koch du kanst gůt pfeffer machen
Hupf vf ich wil dich wol besachen
Die do vornen an dem reigen schlichen
190
Den můst du pfeffer durch strichen
koch
Ich han erlert vil pfeffer seck
Vnd han gemacht vil süs geschlek
Vnd kond doch des köstlin nit vinden
Do mit ich den tod möcht wberwinden
|
tod
195
Purlin mit grosen schůchen do hinden
Zůr mag ich nit erwinden
Du muost mit disen an den tantz
Erst so ist der reig gantz
pur
Ich han gehebt vil arbeit gros
200
Der schweis mir durch min antlit flos
Noch wölt ich gern den tod enpfliechen
So můs ich an disen tantz ziechen
|
tod
Kruch her du můst tantzen lern
Wein oder lach ich han dich gern
205
Vnd hetest du den tuten in dem mund
Es hulf dich nit an diser stund
kind
O we liebe můter min
Ein schwartzer man zuicht mich do hin
Wie wiltu mich also verlon
210
Nu můs ich tantzen vnd kan noch nit gon
|
tod
Na schwigent vnd lond wüer kriegen
Loufend dem kind noch mit der wiegen
Ir müssend ale beide an den tantz
Frow nu lachent so wirt der schinpf gantz
můter
215
O liebes kind ich wolt dich haben erlost
So hat enpfallen mir der trost
Der tod der hat das furkomen
Vnd hat mich mit dir hin genumen
|
O ir torlichen menschen allen
220
Die der bösen welt wellent wol gevallen
Gedencken wie daz ende si
Vnd merckent waz kunftig si do bi
Zům ersten gehört wie vnd wenn
Daz letzst ich uch zwifeltig benem
225
Wo die stat ze bliben ist
Der tod uch allen daz ende bewist
Aber wie vnd wen die zit des todes kumen sol
Daz wisen ir nit wol
Es wirt bekant uch allen hert
230
Waz iederman ist beschert
Vmb daz vnkundig ist die stat
Wo iederman sin bliben hat
Das alles an den werken wirt hangen
Die in diser welt sind begangen
235
Dar um sond ir von sunden lon
Welent ir zů den ende gon
Des ir sind all begirlich
Vnd ist daz wissenlich
Daz der himel wirt den frumen
240
In daz fur die bösen kumen
